អមគណៈកម្មាធិការជាតិអូឡាំពិកកម្ពុជា លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី និងជាប្រធានសហព័ន្ធកីឡារាំកម្ពុជា និងលោក Loke Kah Meng អគ្គនាយកប្រតិបត្តិក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍។

ឯកឧត្តមបណ្ឌិត ថោង ខុន បានមានប្រសាសន៍ថា គណៈកម្មាធិការជាតិអូឡាំពិកកម្ពុជា បានសហការជាមួយក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ ក្នុងការរៀបចំទិវារត់ប្រណាំងស្ត្រីចម្ងាយ ១០គីឡូម៉ែត្រ ក្នុងគោលបំណងអបអរទិវា សិទ្ធិនារីអន្តរជាតិ ៨មីនា ដែលជាថ្ងៃរម្លឹកខួប ១១៣ឆ្នាំ។ លោកបានបន្ថែមទៀតថា នៅក្នុងឆ្នាំនេះគឺពិតជាមានសេចក្តីសោមនស្សរីករាយយ៉ាងក្រៃលែងដោយឃើញថា មានអ្នកចូលរួម រត់ប្រមាណជាង ៣០០០ នាក់ ព្រមទាំងកីឡាករកីឡាការិនីទាំងអស់នឹងទទួលបានមេដាយអនុស្សវរីយ៍គ្រប់ៗគ្នាផងដែរ។

ទន្ទឹមនឹងការបញ្ចប់ដោយជោគជ័យ លោកក៏បានលើកឡើងថា នៅក្នុងឆ្នាំ២០២៤នេះសម្រាប់អ្នករត់ចម្ងាយ ១០គីឡូម៉ែត្រ គឺទទួលបាននូវបទពិសោធន៍ថ្មីមួយដែលមិនអាចបំភ្លេចបាន គឺការរត់កាត់ទីក្រុងកោះពេជ្រ និងស្ពានកោះនរាដែលទើបតែ សម្ពោធឱ្យប្រើប្រាស់ថ្មីៗនេះ។

លោកជំទាវ កុយ ពិសី គូសបញ្ជាក់ថា ទិវារត់ប្រណាំងស្រ្តីចម្ងាយ ១០គីឡូម៉ែត្រនេះ គឺពិតជាមានការចូលរួមយ៉ាងច្រើនកុះករ ពីបុរស និងនារី ព្រមទាំងកុមារ ដោយនេះបញ្ជាក់ឃើញថា បងប្អូនប្រជាពលរដ្ឋយើងមិនថាចាស់ ឬក្មេងចាប់ផ្តើមផ្តោតលើ វិស័យកីឡាច្រើនជាងមុន ដែលទាំងអស់នេះបញ្ជាក់ពីសង្គមជាតិមួយត្រូវមាននូវសុខភាពល្អ និងការរួមសាមគ្គីគ្នារវាងបុរស និងស្ត្រី ដើម្បីលើកស្ទួយសង្គមជាតិយើងឱ្យកាន់តែរីកចម្រើន។

លោក Loke Kah Meng អគ្គនាយកប្រតិបត្តិក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ បានមានប្រសាសន៍ថា យើង មានមោទកភាពយ៉ាងក្រៃលែងក្នុងការសហការណ៍ជាមួយគណៈកម្មាធិការជាតិអូឡាំពិកកម្ពុជា ដើម្បីធ្វើឱ្យព្រឹត្តិការណ៍នេះ ទទួលបានជោគជ័យ។ លោកបានបន្ថែមថា យើងបានឃើញក្រុមគ្រួសារជាច្រើនបានចុះឈ្មោះ សម្រាប់ការរត់លក្ខណសប្បាយៗ និងចំណាយពេលវេលាដ៏មានតម្លៃជាមួយកូនៗរបស់ពួកគេ។

ព្រមទាំងមាន ក្រុមហ៊ុនមួយចំនួនបាន ចុះឈ្មោះឱ្យបុគ្គលិករបស់ពួកគេចូលរួមក្នុងព្រឹត្តិការណ៍ និងគាំទ្រដល់កម្មវិធីសប្បុរសធម៌ផងដែរ។

លោកបានបន្ថែមទៀតថា សុវណ្ណាភូមិ ឡាយហ្វ៍ នឹងផ្តល់ជូនផលិតផល SMILE ដំណោះស្រាយជីវិតដល់កីឡាការិនីដែល ទទួលបានជយលាភីទាំង ៦រូប ដោយឥតគិតថ្លៃ ព្រមទាំងចូលរួមវិភាគទានចំនួនបួនពាន់រៀល សម្រាប់ការចុះឈ្មោះ ចូលរួមរត់មួយនាក់ ដើម្បីផ្តល់មូលនិធិដល់សកម្មភាពសង្គមរបស់ខ្លួនតាមរយៈអង្គការ «សមាគមសហគ្រិនស្រ្តីកម្ពុជា»។

សុវណ្ណាភូមិ ឡាយហ្វ៍ នឹងសហការជាមួយអង្គការ «សមាគមសហគ្រិនស្រ្តីកម្ពុជា» លើវិធីសាស្រ្តមួយប្រកបដោយនិរន្តរភាព ដល់សកម្មភាពសង្គមរបស់ខ្លួនដោយប្រើប្រាស់មូលនិធិដែលទទួលបានពីទិវារត់ប្រណាំងស្ត្រី។

មួយភាគធំនៃមូលនិធិនេះនឹង ត្រូវផ្តល់ជូនដល់សមាគមសហគ្រិនស្រ្តីកម្ពុជាក្នុងគោលដៅគាំទ្រកម្មវិធីបណ្តុះបណ្តាលផ្សេងៗដូចជា ភាពជាអ្នកដឹកនាំរបស់ សហគ្រិន ការរៀបចំផែនការហិរញ្ញវត្ថុ ឬការគ្រប់គ្រងហិរញ្ញវត្ថុ ទីផ្សារប្រព័ន្ធផ្សព្វផ្សាយសង្គម និងកម្មវិធីផ្សេងៗទៀត ដែលស្របនឹងគោលដៅរបស់ក្រុមហ៊ុន។

បន្ថែមលើសពីនេះ យើងក៏មានគ្រូបណ្តុះបណ្តាលពិសេស ដើម្បីគាំទ្រក្នុងការបណ្តុះបណ្តាលអំពីវិស័យហិរញ្ញវត្ថុផងដែរ។ គោលបំណងនៃយុទ្ធនាការនេះគឺដើម្បីចូលរួម និងគាំទ្រដល់សហគ្រិនស្ត្រីវ័យក្មេង ព្រោះវានឹងជួយពង្រីកអាជីវកម្មខ្នាតតូច របស់ពួកគេ ព្រមទាំងលើកកម្ពស់កម្រិតជីវភាពរបស់ពួកគេ។